ქმედითი ანტიკორუფციული პოლიტიკის შემუშავება და მისი წარმატებული განხორციელება საჯარო ადმინისტრირების სანდოობისა და ეფექტიანობის ერთ-ერთი მთავარი წინაპირობაა. აღსანიშნავია, რომ საქართველომ მნიშვნელოვანი პროგრესი განიცადა კორუფციასთან ბრძოლის მიმართულებით, რომელიც ასახულია არაერთ საერთაშორისო რეიტინგსა და კვლევაში.
საქართველო 2008 წლიდან შეუერთდა გაერთიანებული ერების კონვენციას კორუფციის წინააღმდეგ, ხოლო ევროკავშირთან ასოცირების დღის წესრიგით გათვალისწინებულია ანტიკორუფციული მექანიზმების შემდგომი გაუმჯობესება. გრძელდება კორუფციასთან ბრძოლაში ჩართული ორგანიზაციების ინსტიტუციური გაძლიერებისა და საერთაშორისო უკეთეს პრაქტიკასთან დაახლოების პროცესი.
სახელმწიფო აუდიტის სამსახურმა ჩაატარა კორუფციის პრევენციის მიზნით საქართველოს საჯარო სექტორში განხორციელებული ღონისძიებების ეფექტიანობის აუდიტი, რომელიც 2015 წლიდან 2018 წლის პირველ ნახევრამდე პერიოდს მოიცავს.
აუდიტორებმა მოქმედი ანტიკორუფციული ჩარჩოს მიხედვით შეისწავლეს ორი ძირითადი უწყება, რომლებიც საკუთარი კომპეტენციის ფარგლებში პასუხისმგებელნი არიან ეროვნულ დონეზე ანტიკორუფციული ღონისძიებების გატარებაზე: ანტიკორუფციული საბჭო (იუსტიციის სამინისტროსა და სამდივნოს ნაწილში − პოლიტიკის დაგეგმვა, კოორდინაცია და მონიტორინგი) და სსიპ საჯარო სამსახურის ბიურო (საჯარო მოსამსახურის ეთიკასთან დაკავშირებული საკითხები და დეკლარაციები).
აუდიტის მიზანია შეაფასოს კორუფციის პრევენციის მიმართულებით სახელმწიფო პოლიტიკისა და გატარებული ღონისძიებების ეფექტიანობა და პროდუქტიულობა.
სახელმწიფო აუდიტის სამსახურის მოსაზრებით, ეროვნულ დონეზე კორუფციის პრევენციის ღონისძიებები საჭიროებს გაუმჯობესებას.
