სახელმწიფო აუდიტის სამსახურმა შეისწავლა ასპინძის მუნიციპალიტეტის ბიუჯეტების გადასახდელები, ჯამში − 16,321.1 ათასი ლარი
აუდიტის შედეგად გამოვლინდა შემდეგი მიგნებები:
- მუნიციპალიტეტმა სათანადოდ ვერ დაგეგმა საბიუჯეტო სახსრების ხარჯვა. ამასთანავე 2018 წელს ვერ უზრუნველყო დაგეგმილი ინფრასტრუქტურული პროექტების დასრულება, რაც მიუთითებს მუნიციპალიტეტის მფლობელობაში არსებული ფინანსური რესურსების არაეფექტიან მართვაზე;
- მუნიციპალიტეტში მოწყობილი ინფრასტრუქტურული პროექტები ხასიათდება დაზიანებებით. სამუშაოების შესყიდვის პროცესში მერიას არ ჰქონდა დანერგილი ეფექტიანი კონტროლის პროცედურები, რომლებიც უზრუნველყოფდა ხარისხიანი სამუშაოების ჩაბარებას. ასევე არ მომხდარა სათანადო შემდგომი რეაგირება გამოვლენილი ხარვეზების გამოსასწორებლად;
- მუნიციპალიტეტმა, ელექტრონული ტენდერებით შესყიდვის განხორციელებისას, არ გამოიყენა კანონით განსაზღვრული შესაძლებლობა, დისკვალიფიკაცია მიანიჭა დაბალი ფასის წარმომდგენ პრეტენდენტებს და ხელშეკრულება გააფორმა მაღალი ფასის წარმომდგენ პრეტენდენტთან, რითაც დაკარგა სატენდერო ეკონომიის მიღების შესაძლებლობა;
- დაგეგმვასა და კონტროლში არსებული მართვის სისუსტეების შედეგად, მუნიციპალიტეტი აფინანსებდა ორგანიზაციას, რომელზეც ადმინისტრაციული ხარჯის გაწევა, მისი ფუნქცია-მოვალეობიდან გამომდინარე არ იყო მიზანშეწონილი. ამასთანავე, არსებობს რისკი იმისა, რომ ა(ა)იპ-ში საშტატო რიცხოვნობა ხელოვნურად არის გაზრდილი და მათი რაოდენობა არ შეესაბამება რეალურ საჭიროებას;
- მერიამ, საკრებულოს არათანამდებობის პირებზე ხარჯების ასანაზღაურებლად, თანხები გასცა ხარჯის გაწევის დამადასტურებელი პირველადი აღრიცხვის დოკუმენტის წარმოდგენის გარეშე;
- მერიას არ გააჩნია რაციონალური მიდგომა საწვავის ხარჯვასთან დაკავშირებით. შესაბამისად, არსებობს რისკი იმისა რომ საწვავის ხარჯვა ხორციელდება არამიზნობრივად, მუნიციპალიტეტის საჭიროებების შეუსაბამოდ;
- მუნიციპალიტეტში არსებული მართვის სისუსტეების გამო, საბიუჯეტო პროცესი წარიმართა სხვადასხვა ხასიათის ხარვეზებით და მოქმედი კანონმდებლობის დარღვევით;
- მუნიციპალიტეტმა ვერ უზრუნველყო საიჯარო ქირის სრული და დროული მობილიზება შესაბამისი წლის ბიუჯეტში და არც ქირის გადაუხდელობის შემთხვევაში გაუტარებია სათანადო ღონისძიებები მოიჯარეების მიმართ;
- შიდა აუდიტის სამსახურს არ აქვს სისტემაზე ორიენტირებული მიდგომა და ვერ განსაზღვრავს, რამდენად ეფექტიანად და პროდუქტიულად ფუნქციონირებს ცალკეული სისტემა/პროცესი. შესაძლებელია, რომ შიდა აუდიტის სამსახურს გამოვლენის, შესწავლისა და შეფასების გარეშე დარჩეს სისტემური დარღვევა-ნაკლოვანებები. ამდენად, შიდა აუდიტის სამსახურის საქმიანობა სრულად ვერ უზრუნველყოფს მუნიციპალიტეტში მიმდინარე მმართველობითი პროცესების გაუმჯობესებას.
