სახელმწიფო აუდიტის სამსახური

ბორჯომის მუნიციპალიტეტის მერიამ:

• ფინანსური რესურსების რაციონალური მართვის უზრუნველყოფის მიზნით, ბიუჯეტით გათვალისწინებული ასიგნებები გამოიყენოს შესაბამისი წლის ბიუჯეტით დაგეგმილი პროგრამების/ქვეპროგრამების მიზნების და მოსალოდნელი შედეგების მისაღწევად. ასევე ბიუჯეტი დაგეგმოს იმგვარად, რომ არ დაუშვას ნაშთის უკონტროლო დაგროვება და არსებული ნაშთი მაქსიმალურად მიმართოს მუნიციპალიტეტის პრობლემების მოსაგვარებლად;
• მშენებლობებზე საჯარო კონტროლის სათანადოდ განხორციელების მიზნით, დანერგოს კონტროლის დამატებითი მექანიზმები, ასევე შეიმუშაოს სათანადო პროცედურები, რაც უზრუნველყოფს მუნიციპალიტეტის ტერიტორიაზე უნებართვო მშენებლობების დროულ გამოვლენას და შესაბამისად, სამართალდარღვევების პრევენციას, რაც თავის მხრივ, ხელს შეუწყობს სამშენებლო სივრცის დაგეგმარებასთან და განვითარებასთან დაკავშირებით მთავრობის მიერ შემუშავებული პრინციპების სათანადოდ დაცვას. გამოავლინოს ის პასუხისმგებელი პირები, რომელთა კომპეტენციასაც განეკუთვნება უნებართვო მშენებლობების გამოვლენა-რეაგირება და მათ მიმართ გაატაროს კანონით გათვალისწინებული ღონისძიებები;
• საქონლის ეკონომიურად შესყიდვის მიზნით, ბაზრის კვლევის ჩატარების დროს მაქსიმალურად უნდა გაითვალისწინოს შესასყიდი საქონლის ჩანაცვლებადობის პრინციპი და სატენდერო სპეციფიკაციები ისე განსაზღვროს, რომ ხელი შეუწყოს კონკურენტული გარემოს შექმნას. აღნიშნული მუნიციპალიტეტს საშუალებას მისცემს, შეისყიდოს ბაზარზე არსებული საუკეთესო საქონელი ეკონომიურ ფასად, ასევე შეისწავლოს იმ პირების პასუხისმგებლობის საკითხი, რომელთაც ევალებოდათ შესყიდვის პროცესის სათანადოდ წარმართვა და მათ მიმართ გაატაროს კანონით განსაზღვრული ღონისძიებები;
• საკრებულოსთან შეთანხმებით, დაგეგმოს და განახორციელოს კომპლექსური ღონისძიებები, რომლებიც უმოკლეს ვადაში უზრუნველყოფს მოსახლეობის წყალმომარაგების გაუმჯობესებას. ღონისძიებათა გეგმა უნდა ითვალისწინებდეს როგორც წყლის, ასევე საბიუჯეტო რესურსების რაციონალურ ხარჯვას. გამოიყენოს ის აქტივები, რომლებმაც უნდა უზრუნველყოს მოსახლეობისთვის სტანდარტების შესაბამისი წყლის მიწოდებას, ხოლო წყლის სისტემის მომსახურებისა და ხარისხის შემოწმების მიზნით, მუნიციპალიტეტმა ითანამშრომლოს მხოლოდ სათანადო ლიცენზიის მქონე ორგანიზაციებთან. აღნიშნული ხელს შეუწყობს მოსახლეობის სოციალური პირობების გაუმჯობესებას, წყლის სისტემის გამართულ ექსპლოატაციას და მიწოდების ხარჯების შემცირებას;
• ბინათმესაკუთრეთა ამხანაგობის პროგრამის ფარგლებში შეიმუშაოს და დანერგოს ისეთი კონტროლის სისტემა, რომელიც გამორიცხავს პროგრამის მიზნების შეუსაბამო პროექტის შერჩევას. აღნიშნული მას საშუალებას მისცემს პრიორიტეტულად შეასრულოს ის სამუშაოები, რომლებიც ობიექტური საჭიროებებიდან გამომდინარეობს. ამასთანავე, იმ პასუხისმგებელი პირების მიმართ, რომლებმაც სარეაბილიტაციო ობიექტების შერჩევის დროს არ იხელმძღვანელეს პროგრამის მიზნებითა და ამოცანებით, გაატაროს კანონმდებლობით გათვალისწინებული სათანადო ღონისძიებები.

ა(ა)იპ − ბორჯომის ცენტრალური (ისტორიული) პარკის ადმინისტრაციამ:

• სათანადოდ შეისწავლოს მის საკუთრებაში არსებული საცურაო აუზის უფუნქციოდ დარჩენის მიზეზები და გაატაროს აღდგენისთვის საჭირო სათანადო ღონისძიებები. ასევე იგი ვალდებულია უზრუნველყოს ქონების სათანადო დაცვა და არ დაუშვას დაკეტილი აუზის შენობის დაზიანება. აღნიშნული ორგანიზაციას საშუალებას მისცემს შეფერხებების გარეშე და ხანგრძლივი ვადით გამოიყენოს არსებული ინფრასტრუქტურა და მაქსიმალური სარგებელი მიიღოს მისგან;
• შეიმუშაოს და დანერგოს სათანადო კონტროლის მექანიზმები, ისტორიული პარკის სერვისებიდან მიღებული შემოსავლების სათანადო აღრიცხვის მიზნით. მნიშვნელოვანია, შემოსავლების აღრიცხვა დაიგეგმოს და განხორციელდეს ისე, რომ სრულად იქნეს გამოყენებული ტურნიკეტებისა და შესყიდული პროგრამული უზრუნველყოფის შესაძლებლობები. აღნიშნული ორგანიზაციას საშუალებას მისცემს შეამციროს შემოსავლების არაზუსტად აღრიცხვის რისკები.

ბორჯომის მუნიციპალიტეტის მერიამ:

• დანერგოს სათანადო კონტროლის მექანიზმები, რომლებიც უზრუნველყოფს მის საკუთრებაში არსებული ქონების არაუფლებამოსილი პირების მიერ გამოყენების იდენტიფიკაციას და მოახდენს შესაბამის რეაგირებას. აღნიშნული ხელს შეუწყობს მუნიციპალური ქონების მართვის სისტემის გაუმჯობესებას და ავტოსადგომის მომხმარებლებს საშუალებას მისცემს არ გადაიხადონ დამატებითი საფასური იმ სერვისში, რომელიც მერიის გადაწყვეტილებით არის უფასო;
• შეისწავლოს მის მიერ დაფუძნებული იურიდიული პირების საქმიანობა და არსებული საკადრო პოლიტიკა, განსაზღვროს, რამდენად პასუხობს მათი საქმიანობა მუნიციპალიტეტის მიზნებსა და ამოცანებს. აგრეთვე მნიშვნელოვანია განხორციელდეს ა(ა)იპ-ებში დასაქმებულთა უფლება- მოვალეობების და მათზე დახარჯული სახსრების ანალიზი. საჭიროების შემთხვევაში, მუნიციპალიტეტმა უზრუნველყოს თანამშრომელთა ფუნქციური დატვირთვა ან საშტატო ერთეულების ოპტიმიზაცია. აღნიშნული ხელს შეუწყობს საბიუჯეტო რესურსების ეკონომიურად და რაციონალურად ხარჯვას;
• განახორციელოს ქონების, მოთხოვნებისა და ვალდებულებების ინვენტარიზაცია კანონმდებლობით დადგენილი წესით, რაც უზრუნველყოფს აქტივებისა და ვალდებულებების ფაქტობრივი ნაშთების დადგენას და მათ შედარებას ორგანიზაციის სააღრიცხვო მონაცემებთან, რის საფუძველზეც შესაძლებელი იქნება ინვენტარიზაციის შედეგების დადგენა და შესაბამისი მატერიალურად პასუხისმგებელი პირების გამოვლენა. აღნიშნული გაზრდის მუნიციპალური აქტივების დაცულობის ხარისხს. ასევე იმ პასუხისმგებელი პირების მიმართ, რომელთაც ევალებოდათ წინა წელს გაცემული რეკომენდაციის შესრულება და ინვენტარიზაციის ჩატარება, მერიამ გაატაროს კანონით განსაზღვრული სათანადო ღონისძიებები;
• უზრუნველყოს შიდა აუდიტის სამსახურის საქმიანობის იმგვარი წარმართვა, რომელიც ხელს შეუწყობს ორგანიზაციის შიდა კონტროლის სისტემების შესწავლასა და შეფასებას, ასევე პროცესებში არსებული რისკებისა და სისტემური ხარვეზების გამოვლენას. მიღებული შედეგების საფუძველზე, სამსახურმა შეიმუშაოს რეკომენდაციები და განახორციელოს მისი მუდმივი მონიტორინგი. აღნიშნული ხელს შეუწყობს მუნიციპალიტეტის საქმიანობის ეკონომიურობის, ეფექტიანობისა და პროდუქტიულობის გაზრდას და საჯარო ფინანსების მართვის გაუმჯობესებას.