სახელმწიფო აუდიტის სამსახურმა შეისწავლა საერთო სასამართლოების 2017-2018 წლების აქტივების მართვა და სახელმწიფო შესყიდვები
აუდიტის შედეგად გამოვლინდა შემდეგი მიგნებები:
ინვენტარიზაციის პროცესში გამოვლენილი ნაკლოვანებები:
საერთო სასამართლოების სისტემაში არსებული კონტროლის მექანიზმები სრულად ვერ უზრუნველყოფს სასამართლოებზე გადაცემული ფინანსური და მატერიალური რესურსების ხარჯვის მონიტორინგს. ინვენტარიზაციის ჩატარების არსებული პრაქტიკა სრულად არ შეესაბამება მოქმედ კანონმდებლობას.
თბილისის საქალაქო სასამართლოს ახალი შენობის მშენებლობისათვის გადმოცემულ ქონებასთან დაკავშირებით გამოვლენილი მიგნებები:
2016 წლის 30 დეკემბერს, მთავრობის განკარგულებით, ქონების ეროვნულ სააგენტოს თანხმობა მიეცა სახელმწიფო საკუთრებაში არსებული ქონება გაეცვალა სამ მიწის ნაკვეთში, რომლებიც გადაეცა საერთო სასამართლოების დეპარტამენტს, საქალაქო სასამართლოს ახალი შენობის მშენებლობის მიზნით. აღნიშნული მიწის ნაკვეთები დეპარტამენტს გადმოეცა 2017 წლის 26 იანვარს, ხოლო მისი ბალანსზე ღირებულებით ასახვა განხორციელდა 2018 წლის მეორე ნახევარში. საბალანსო ღირებულებად კი განისაზღვრა დეპარტამენტის დაკვეთით ჩატარებული ქონების დამატებითი (ახალი) შეფასებით გამოვლენილი ღირებულება, რაც თავდაპირველი შეფასებების ღირებულებაზე დაახლოებით 2,5 მილიონი ლარით ნაკლებია. აუდიტის ჯგუფმა ვერ მოიპოვა მაღალი ხარისხის რწმუნება ქონების თითქმის ორი წლის დაგვიანებით აღრიცხვისა და საბალანსო ღირებულების სისწორის შესახებ.
IT ინფრასტრუქტურის ნაკლოვანებები:
„საერთო სასამართლოების შესახებ“ ორგანული კანონის მოთხოვნაა სასამართლო პროცესების აუდიო- ვიდეოჩაწერის უზრუნველყოფა, თუმცა, ნორმატიული აქტებით არ არის დაკონკრეტებული, თუ რა ვადით უნდა ინახებოდეს სასამართლო პროცესების აუდიო-ვიდეოჩანაწერები სისტემაში. შესაბამისად, დაინტერესებულ პირებს უფლება აქვთ მოითხოვონ ნებისმიერი პროცესის ჩანაწერები, მისი ხანდაზმულობის მიუხედავად. დეპარტამენტს აღნიშნულის უზრუნველყოფა არ შეუძლია, რადგან ჩანაწერები, არსებული IT ინფრასტრუქტურის პირობებში, მხოლოდ გარკვეული ვადით ინახება.
2018 წელს, იუსტიციის უმაღლესი საბჭოს ინიციატივით, ჩატარდა სასამართლოს სისტემაში არსებული IT ინფრასტრუქტურის სრული შეფასების აუდიტი. აუდიტის დასკვნის საფუძველზე, დეპარტამენტს დაევალა გარკვეული IT ინფრასტრუქტურის შესაძენად შესაბამისი ღონისძიებების გატარება. ტექნიკური პარამეტრების დაზუსტების პროცედურების გახანგრძლივების გამო, დეპარტამენტმა ვერ განახორციელა აქტივების ნაწილის შეძენა-დანერგვა, ხოლო ამ მიმართულებით არსებული კონკრეტული გეგმისა და სტრატეგიის შესახებ დოკუმენტურად დასაბუთებული ინფორმაცია აუდიტის ჯგუფმა ვერ მოიპოვა.
ავტოპარკის მართვის ნაკლოვანებები:
საერთო სასამართლოების სისტემაში არ არის დარეგულირებული სატრანსპორტო საშუალებების რაოდენობა სასამართლოების მიხედვით (გარდა განპიროვნებული ფუნქციის მქონე ავტომანქანებისა). ამასთან, არ არის დადგენილი ავტომანქანებზე საწვავის ლიმიტების გაანგარიშების და განსაზღვრის ერთიანი წესი.
სახელმწიფო შესყიდვებში არსებული ნაკლოვანებები:
კონკურენციის გარეშე მიმდინარეობდა დეპარტამენტის მიერ ვიდეო-სამეთვალყურეო სისტემის შესყიდვის მიზნით გამოცხადებული ტენდერები. სატენდერო დოკუმენტაციით ვიდეოკამერებთან ერთად გათვალისწინებული იყო შესაბამისი ლიცენზიის შესყიდვა. გასულ პერიოდში (2017-2018 წლებში), კონკრეტული ლიცენზიის მიწოდება მხოლოდ ერთი პირის ექსკლუზიურ უფლებამოსილებას წარმოადგენდა. შედეგად, ვიდეო-სამეთვალყურეო სისტემის ლიცენზიასთან ერთად შესყიდვა ფორმალურ ხასიათს ატარებდა, რამაც კონკრეტულ ტენდერში კონკურენცია შეზღუდა და მხოლოდ ერთმა პრეტენდენტმა მიიღო მონაწილეობა;
დასუფთავების მომსახურების შესყიდვასთან ერთად, ერთი ტენდერის ფარგლებში, დეპარტამენტმა მოითხოვა ასევე სხვადასხვა სახის მომსახურებების შესყიდვა (ლიფტების მომსახურება, ხანძარსაწინააღმდეგო სისტემების მონიტორინგი, სანტექნიკა, კანალიზაცია, გენერატორის, შიდა სატელეფონო ქსელისა და სატელეფონო ავტოსადგურის მოვლა-შენახვა, გათბობა-კონდიცირების შეკეთება). აღნიშნული ტიპის მომსახურებების შესყიდვა ერთი ტენდერის მეშვეობით ამცირებს კონკურენციას. ამასთანავე, ვერ საბუთდება აღნიშნული კომპანიების მიერ ზოგიერთი მომსახურებისთვის გაწეული ხარჯების რეალურობა.
სამშენებლო სამუშაოებზე ზედმეტად გადახდილი საბიუჯეტო სახსრები:
აუდიტის შედეგად გამოვლინდა საპროექტო-სახარჯთაღრიცხვო დოკუმენტაციის შედგენისა და მშენებლობის განხორციელების პროცესში არსებული კონტროლის ნაკლოვანებები. 2017-2018 წლებში ორი სამშენებლო კომპანიისთვის ჯამურად, ზედმეტად გადახდილია 125,216 ლარი. დეპარტამენტმა თანხის დაბრუნების მიზნით მიმართა სამშენებლო კომპანიებს და აღნიშნული თანხა დაბრუნებულია სახელმწიფო ბიუჯეტში.
