სახელმწიფო აუდიტის სამსახური

რეკომენდაცია N1: ქალაქ ბათუმის მუნიციპალიტეტის მერიას

ქალაქ ბათუმის მუნიციპალიტეტის მერიამ შეიმუშაოს და პრაქტიკაში დანერგოს ისეთი კონტროლის სისტემა, რომელიც უზრუნველყოფს განსახორციელებელი მომსახურების მიმდინარეობაზე ზედამხედველობას, ხარვეზების დროულ გამოვლენას და სათანადო რეაგირებას. გონივრულ დროში განსაზღვროს ქალაქის დასუფთავების მომსახურების სატენდერო წინადადებასა და ხელშეკრულებაში გასაწევი მომსახურების ფაქტობრივი მოცულობები, რომ მიწოდებული სერვისის საფასური მართლზომიერად იქნეს გადახდილი. ამასთანავე, დაადგინოს მომსახურების ღირებულების არასწორად ასახვის, მიმწოდებელზე ზედმეტად 30,501 ლარის და ფაქტობრივად გაწეული მომსახურების იდენტიფიცირების გარეშე − 411,838 ლარის გადახდის გამომწვევი მიზეზები და გაატაროს სამართლებრივი ღონისძიებები.

რეკომენდაცია N2: ქალაქ ბათუმის მუნიციპალიტეტის მერიას და ა(ა)იპ − საქალაქო ინფრასტრუქტურისა და კეთილმოწყობის სამმართველოს

ქალაქ ბათუმის მუნიციპალიტეტის მერიამ და ა(ა)იპ − საქალაქო ინფრასტრუქტურისა და კეთილმოწყობის სამმართველომ დანერგოს შიდა კონტროლის მექანიზმები, გარე განათების წერტების მოვლა-ექსპლუატაციის სახელმწიფო შესყიდვის სავარაუდო ღირებულების დადგენის, ბაზრის ტენდენციების და ფასების განვითარების დინამიკის შესწავლის, კონკურენტუნარიანი სახელმწიფო შესყიდვების და საბიუჯეტო სახსრების რაციონალური ხარჯვის უზრუნველსაყოფად. ამასთანავე, ქალაქ ბათუმის მერიის ხელმძღვანელობამ განიხილოს გარე განათების ქსელის განვითარების და მოვლა-პატრონობის ქვეპროგრამის ფარგლებში საბიუჯეტო სახსრების დაუსაბუთებლად ხარჯვის გამომწვევი მიზეზები, ასევე აუდიტის სამსახურის მიერ გაცემული რეკომენდაციების გაუთვალისწინებლობის ფაქტი და შესაბამისი პასუხისმგებელი პირების მიმართ გაატაროს სამართლებრივი ღონისძიებები. ამასთანავე უზრუნველყოს, რომ ა(ა)იპ − საქალაქო ინფრასტრუქტურისა და კეთილმოწყობის სამმართველომ განახორციელოს შპს „აჭარგანათებაზე“ დაუსაბუთებლად გადახდილი თანხის სრული იდენტიფიცირება და ბიუჯეტის ანგარიშზე ჩარიცხვა.

რეკომენდაცია N3: ქალაქ ბათუმის მუნიციპალიტეტის მერიას და ა(ა)იპ − საქალაქო ინფრასტრუქტურისა და კეთილმოწყობის სამმართველოს

ქალაქ ბათუმის მუნიციპალიტეტის მერიამ და ა(ა)იპ − საქალაქო ინფრასტრუქტურისა და კეთილმოწყობის სამმართველომ დანერგოს ისეთი კონტროლის მექანიზმები, რაც უზრუნველყოფს ხელშეკრულების შესრულების მონიტორინგს, ხელს შეუწყობს სამუშაოების უკეთ წარმოებას და მინიმუმამდე შეამცირებს ხარვეზებით შედგენილი პროექტების მიღებას. ამასთანავე, გამოკვლეულ იქნეს ხარვეზით მიწოდებულ საპროექტო დოკუმენტაციაზე რეაგირების განუხორციელებლობის გამომწვევი მიზეზები და შესაბამისი პასუხისმგებელი პირების მიმართ გაატაროს სათანადო ღონისძიებები.

რეკომენდაცია N4: ქალაქ ბათუმის მუნიციპალიტეტის მერიას

ქალაქ ბათუმის მუნიციპალიტეტის მერიის ხელმძღვანელობამ შეიმუშაოს და დანერგოს ისეთი კონტროლის მექანიზმები, რითაც დროულად და სრულად იქნება გამოვლენილი ხარვეზები და არ დაუშვას შეუსრულებელი სამუშაოს პირობებში, სამუშაოს მიღება-ჩაბარება და მიმწოდებელზე თანხების ანაზღაურება. ამასთანავე, დაადგინოს მიმწოდებლის მიერ შეუსრულებელი სახელშეკრულებო ვალდებულების პირობებში სამუშაოების ჩაბარების მიზეზები და შესაბამისი პასუხისმგებელი პირების მიმართ გაატაროს სამართლებრივი ღონისძიებები.

რეკომენდაცია N5: ა(ა)იპ − საქალაქო ინფრასტრუქტურისა და კეთილმოწყობის სამმართველოს

ა(ა)იპ − საქალაქო ინფრასტრუქტურისა და კეთილმოწყობის სამმართველომ საპროექტო-სახარჯთაღიცხვო დოკუმენტაციის სახელმწიფო შესყიდვა განახორციელოს საჭიროებებისა და მიზანშეწონილობის სათანადო შესწავლისა და შესაძლო უარყოფითი შედეგების ხარჯეფექტურობის ანალიზის საფუძველზე. ამასთანავე, გამოკვლეულ იქნეს დოკუმენტაციის შესყიდვაში არსებული ხარვეზების და საბიუჯეტო სახსრების შესაძლო არარელევანტური ხარჯვის გამომწვევი მიზეზები და შესაბამისი პასუხისმგებელი პირების მიმართ გაატაროს სამართლებრივი ღონისძიებები.

რეკომენდაცია N6: ა(ა)იპ − საქალაქო ინფრასტრუქტურისა და კეთილმოწყობის სამმართველოს

ა(ა)იპ − საქალაქო ინფრასტრუქტურისა და კეთილმოწყობის სამმართველოს მიერ შეიქმნას ისეთი კონტროლის სისტემა, რომელიც უზრუნველყოფს ზუსტად და საფუძვლიანად განისაზღვროს შესყიდვის სავარაუდო ღირებულება, ხოლო მიმწოდებელთან ანგარიშსწორება განხორციელდეს მხოლოდ ფაქტობრივი დანახარჯების დამადასტურებელი დოკუმენტების წარმოდგენის პირობებში. ამასთანავე, შესაბამისმა პასუხისმგებელმა პირებმა, სამშენებლო სამუშაოების მიწოდებაზე გაფორმებული გამარტივებული შესყიდვის ხელშეკრულებების ფარგლებში, უზრუნველყონ ფაქტობრივად გაწეული ხარჯების დამადასტურებელი მტკიცებულების გარეშე მიმწოდებელზე ზედმეტად გადახდილი თანხის სრული იდენტიფიცირება და ბიუჯეტში დაბრუნება.

რეკომენდაცია N7: ა(ა)იპ − „ბათუმის სასაფლაოებს“

ა(ა)იპ − „ბათუმის სასაფლაოებში“ შემუშავდეს და ამოქმედდეს ადამიანური რესურსების მართვის ისეთი პოლიტიკა, რომელიც უზრუნველყოფს „საქართველოს შრომის კოდექსის“ და აღნიშნული დაწესებულების შინაგანაწესის პირობების შესრულებას. სამუშაო დროის განმავლობაში პირის მიერ გაწეული საქმიანობის დადასტურების მიზნით, კონკრეტული პოზიციის მიხედვით განისაზღვროს დასაქმებულის მიერ შესასრულებელი სამუშაოები და შრომის ანაზღაურების გაცემა განხორციელდეს ფაქტობრივად შესრულებული შრომითი საქმიანობის შესაბამისად.

რეკომენდაცია N8: ა(ა)იპ − „ბათუმის სასაფლაოებს“

ა(ა)იპ − „ბათუმის სასაფლაოების“ ხელმძღვანელობამ შეიმუშაოს და დანერგოს ისეთი კონტროლის მექანიზმები, რაც დროულად და სრულად გამოავლენს ხარვეზებს და უზრუნველყოფს ფაქტობრივად გაწეული ხარჯების დადასტურების საფუძველზე მიმწოდებელთან ანგარიშსწორებას. ამასთანავე, დაადგინოს პრიორიტეტით გათვალისწინებული სამშენებლო სამუშაოების შეუსრულებლობის პირობებში საბიუჯეტო სახსრების ხარჯვის გამომწვევი მიზეზები და შესაბამისი პასუხისმგებელი პირების მიმართ გაატაროს ქმედითი ღონისძიებები.