სახელმწიფო აუდიტის სამსახური

მუნიციპალიტეტის მერიამ:

• ფინანსური რესურსების რაციონალური მართვის უზრუნველყოფის მიზნით, ბიუჯეტით გათვალისწინებული ასიგნებები გამოიყენოს შესაბამისი წლის ბიუჯეტით დაგეგმილი პროგრამების/ქვეპროგრამების მიზნების და მოსალოდნელი შედეგების მისაღწევად; ამასთანავე, ბიუჯეტი დაგეგმოს იმგვარად, რომ არ დაუშვას ნაშთის უკონტროლო დაგროვება და არსებული ნაშთი მიმართოს პრიორიტეტული პროექტების განსახორციელებლად;
• დანერგოს კონტროლის შესაფერისი მექანიზმები და საპროექტო- სახარჯთაღრიცხვო დოკუმენტაციის შესყიდვა დაგეგმოს ყველა იმ ფაქტორის გათვალისწინებით, რამაც შესაძლოა ხელი შეუშალოს პროექტების წარმატებით განხორციელებას. ამასთანავე, შეისწავლოს და შეაფასოს გამოუყენებელი დოკუმენტაცია და გაატაროს შესაბამისი ღონისძიებები დანიშნულების მიხედვით გამოსაყენებლად;
• უზრუნველყოს ხელშეკრულებებით განსაზღვრული პირობების დაცვა და არ დაუშვას მათი შეცვლა შემსყიდველის ინტერესების საზიანოდ. კერძოდ, საჯარიმო სანქციები გაიანგარიშოს სახელშეკრულებო პირობების შესაბამისად. აღნიშნული ხელს შეუწყობს სამუშაოების დროულ დასრულებას, მიმწოდებლების მიმართ ერთგვაროვანი მიდგომის ჩამოყალიბებას და საბიუჯეტო შემოსავლების გაზრდას;
• დანერგოს ისეთი კონტროლის მექანიზმები და პროცედურები, რომლებიც უზრუნველყოფს მაღალი რწმუნების მიღებას, რომ ხელშეკრულებით განსაზღვრული სამუშაოები სრულდება ხარისხიანად და ხელშეკრულების პირობების შესაბამისად; რეგულარულად აწარმოოს შესყიდული ობიექტების მონიტორინგი და ხარვეზების გამოვლენის შემთხვევაში, აამოქმედოს გარანტიის მექანიზმი ნაკლოვანებების/ხარვეზების დროულად აღმოფხვრის მიზნით. აღნიშნული ხელს შეუწყობს ობიექტების გამართულ ფუნქციონირებას და ინფრასტრუქტურული პროექტებით სარგებლობის შესაძლებლობას ხანგრძლივი პერიოდის განმავლობაში;
• გაატაროს ქმედითი ღონისძიებები გადაუხდელი საიჯარო თანხის და საურავის ადგილობრივ ბიუჯეტში მობილიზების მიზნით. ამასთანავე, შეისწავლოს სარგებლობის უფლებით გაცემული ქონების საფასურის განსაზღვრის საკითხი და შესაბამისობაში მოიყვანოს მოქმედ საბაზრო ფასებთან. აღნიშნული ხელს შეუწყობს ადგილობრივი ბიუჯეტის საკუთარი შემოსავლების ზრდას და მუნიციპალური ქონების ეფექტიან გამოყენებას;
• უზრუნველყოს შიდა აუდიტის სამსახურის საქმიანობის იმგვარი წარმართვა, რომელიც შეისწავლის და შეაფასებს ორგანიზაციის შიდა კონტროლის სისტემებს, ასევე პროცესებში არსებული რისკებს და გამოავლენს სისტემურ ხარვეზებს. მიღებული შედეგების საფუძველზე, სამსახურმა შეიმუშაოს სათანადო რეკომენდაციები და განახორციელოს მათი მუდმივი მონიტორინგი. აღნიშნული ხელს შეუწყობს მუნიციპალიტეტის საქმიანობის ეკონომიურობის, ეფექტიანობისა და პროდუქტიულობის გაზრდას და საჯარო ფინანსების მართვის გაუმჯობესებას.

მუნიციპალიტეტის საკრებულომ და მერიამ:

• შეიმუშაოს კონტროლის დამატებითი მექანიზმები, რომლებიც ხელს შეუწყობს ქონების მართვისა და განკარგვის პროცესის გაუმჯობესებას;
• იმსჯელოს დასუფთავების მოსაკრებლის დაგეგმილი მაჩვენებლი მობილიზების მიზნით გასატარებელ ღონისძიებებზე, რაც ხელს შეუწყობს მუნიციპალიტეტის ბიუჯეტის სწორად დაგეგმვასა და კუთვნილი შემოსავლების მიღებას;
• შეიმუშაოს წესი საწვავის განაწილებისა და ხარჯვის შესახებ. აღნიშნული დოკუმენტი, რომელიც დაეფუძნება მიღებულ კარგ პრაქტიკას, ხელს შეუწყობს საწვავის ხარჯების რაციონალიზაციას;
• გადახედოს არსებულ პრაქტიკას, განიხილოს გაწეული საქმიანობის შესახებ ინფორმაციის გავრცელების მეთოდები, დაფინანსების საკითხი და მიიღოს ოპტიმალური გადაწყვეტილება, რაციონალურობის პრინციპის დაცვით, მოსახლეობის ინტერესების გათვალისწინებით. აღნიშნული ხელს შეუწყობს მოსახლეობისათვის სასარგებლო მომსახურების მიღება-გავრცელებასა და საბიუჯეტო თანხების რაციონალურ ხარჯვას.