ყაზბეგის მუნიციპალიტეტის საქმიანობის აუდიტის ანგარიში

სახელმწიფო აუდიტის სამსახურმა ჩაატარა ყაზბეგის მუნიციპალიტეტის 2018-2019 წლების საქმიანობის შესაბამისობის აუდიტი.

აუდიტის შედეგად გამოვლინდა შემდეგი მიგნებები:

ფინანსური რესურსების მართვა

ფინანსური რესურსების მართვაში არსებული ნაკლოვანებები - მუნიციპალიტეტში არსებობს როგორც ფინანსური რესურსების, ასევე დაგეგმილი ინფრასტრუქტურული პროექტების მართვის ხარვეზები. მუნიციპალიტეტმა ვერ უზრუნველყო არაფინანსური აქტივების ზრდის პარამეტრების სათანადოდ დაგეგმვა, რის გამოც შესაბამისი საბიუჯეტო მუხლის შესრულებას 2018-2019 წლებში, შესაბამისად, 31% და 17% დააკლდა.

ინფრასტრუქტურის მშენებლობა, რეაბილიტაცია და ექსპლუატაცია

მოუვლელი და გამოუყენებელი ინფრასტრუქტურული პროექტები - მერიის მიერ დანერგილი არასათანადო კონტროლის მექანიზმების გამო, ინფრასტრუქტურული პროექტები, რომელთა რეაბილიტაციაზე არსებითი მოცულობის ფინანსური რესურსი დაიხარჯა, მოუვლელია, რის გამოც ამ ობიექტებით სრულფასოვნად ვერ სარგებლობენ.

უხარისხოდ შესრულებული ინფრასტრუქტურული პროექტები - მუნიციპალიტეტის შესაბამისმა პასუხისმგებელმა პირებმა პროცესები წარმართეს ისე, რომ ჩაიბარეს ინფრასტრუქტურული პროექტები, რომელთა ხარისხი არ იყო სათანადოდ დადასტურებული. შედეგად, ობიექტები დაზიანებულია და საჭიროებს რეაბილიტაციას.

სახელმწიფო შესყიდვების მართვა

სახელმწიფო შესყიდვების პროცესში არსებული ხარვეზები - მუნიციპალიტეტის მიერ სამშენებლო სამუშაოების შესყიდვისას, არაგონივრულად მაღალი გამოცდილების მოთხოვნის გამო, რიგ შემთხვევაში ტენდერები არ შედგა. აღნიშნულის შემდეგ, გადაუდებელი აუცილებლობის საფუძვლით, გამარტივებული შესყიდვის ფორმით, კანონმდებლობის დარღვევით, ხელშეკრულებები გაფორმდა ისეთ მიმწოდებლებთან, რომლებსაც არ გააჩნდათ მსგავსი მოცულობის და სპეციფიკის სამუშაოების შესრულების გამოცდილება.

აფიდავიტის დარღვევის რისკი - საგზაო სამუშაოს შესყიდვისას ერთ შემთხვევაში გამოვლინდა რისკი იმისა, რომ ტენდერში მონაწილე პრეტენდენტები, კონკურენტული გარემოს ხელოვნურად შექმნის მიზნით, მოქმედებდნენ ურთიერთშეთანხმებით. ამასთანავე, მუნიციპალიტეტს არსებული გარემოების გამოსავლენად შესაბამისი ღონისძიებები არ განუხორციელებია.

მმართველობითი გადაწყვეტილებები

სახელმწიფო შესყიდვის არასწორი ფორმით განხორციელებული შესყიდვები - მუნიციპალიტეტმა გადაუდებელი აუცილებლობის მოტივით, გამარტივებული შესყიდვის ფორმით, განახორციელა სამი შესყიდვა. აღნიშნული ვითარება არ წარმოადგენდა გადაუდებელ აუცილებლობას, რადგან შესაძლებელი იყო მათი წინასწარი დაგეგმვა და ტენდერის გამოცხადება.

შიდა აუდიტი

შიდა აუდიტის სამსახურის საქმიანობის ნაკლოვანებები - შიდა აუდიტის სამსახურს არ შეუსწავლია ორგანიზაციაში არსებული პროცესები და შიდა კონტროლის სისტემები, არ გამოუვლენია სისტემური ხასიათის რისკები და მათი აღმოფხვრის მიზნით არ გაუცია შესაბამისი რეკომენდაციები.

ყაზბეგის მუნიციპალიტეტის მერიამ:

ფინანსური რესურსების რაციონალური მართვის უზრუნველყოფის მიზნით, მუნიციპალიტეტის მერიამ ბიუჯეტით გათვალისწინებული ასიგნებები გამოიყენოს შესაბამისი წლის ბიუჯეტით დაგეგმილი პროგრამების/ქვეპროგრამების მიზნებისა და მოსალოდნელი შედეგების მისაღწევად. ამასთანავე, ბიუჯეტი დაგეგმოს იმგვარად, რომ არ დაუშვას ნაშთის უკონტროლო დაგროვება და არსებული ნაშთი მიმართოს დაგეგმილი ინფრასტრუქტურული პროექტების განსახორციელებლად;
ინფრასტრუქტურული პროექტების დაგეგმვისას გაითვალისწინოს მათი პრიორიტეტულობა და საჭიროება. განხორციელებული პროექტების ხანგრძლივი პერიოდის განმავლობაში გამართულად ფუნქციონირების მიზნით, მუნიციპალიტეტი ვალდებულია უზრუნველყოს ინფრასტრუქტურული პროექტების შემდგომი მოვლა-პატრონობა. მუნიციპალიტეტმა დანერგოს კონტროლის სათანადო მექანიზმები, განსაზღვროს პასუხისმგებელი პირები და მუდმივი მონიტორინგის გზით უზრუნველყოს ამ მიმართულებით განხორციელებული საქმიანობის კონტროლი;
შეიმუშაოს და დანერგოს სამშენებლო სამუშაოების მიღებისა და ჩაბარების წესი, სადაც დეტალურად იქნება გაწერილი მოქმედი სტანდარტების დაცვით სამუშაოების შესრულებისათვის საჭირო კონტროლის მექანიზმები. ნათლად უნდა განისაზღვროს, კონტროლის თითოეულ ეტაპზე ჩასატარებელი სამუშაოები და კონტროლის განმახორციელებელი პირები, მათი მოვალეობები და პასუხისმგებლობები. აღნიშნული უზრუნველყოფს კონტროლის მექანიზმების გამართულ ფუნქციონირებასა და პროექტის შემოწმებისათვის საჭირო ყველა პროცედურის სათანადოდ წარმართვას. ამასთანავე, მუნიციპალიტეტმა გამოიყენოს ხელშეკრულებით განსაზღვრული მექანიზმები, მიმართოს მიმწოდებლებს და უზრუნველყოს დაზიანებული პროექტების საგარანტიო ვადაში გამოსწორება;
შეიმუშაოს შესყიდვების მართვის სტრატეგია და დანერგოს შესაბამისი კონტროლის მექანიზმები, რომლებიც უზრუნველყოფენ შესყიდვის პროცესის მართლზომიერად წარმართვას, სატენდერო დოკუმენტაციის გონივრულად შემუშავებასა და კონკურენტული გარემოს შექმნას. აღნიშნული ხელს შეუწყობს საბიუჯეტო სახსრების რაციონალურ ხარჯვასა და ინფრასტრუქტურული პროექტების დროულად და ხარისხიანად შესრულებას. ამასთანავე, მუნიციპალიტეტმა შეისწავლოს კონკრეტული ფაქტები, გამოავლინოს პასუხისმგებელი პირები და გაატაროს მათ მიმართ შესაბამისი ღონისძიებები.