სახელმწიფო აუდიტის სამსახური

ხულოს მუნიციპალიტეტის ხელმძღვანელობას

რეკომენდაცია N1:

მუნიციპალიტეტმა უზრუნველყოს პროგრამების საბიუჯეტო პარამეტრების განსაზღვრა არსებული ფაქტობრივი გარემოებების შესწავლისა და ანალიზის შედეგების შესაბამისად, რაც ხელს შეუწყობს ბიუჯეტის სწორად დაგეგმვასა და ფულადი რესურსების ეფექტიან ხარჯვას.

რეკომენდაცია N2:

მუნიციპალიტეტმა შეიმუშავოს კონტროლის ისეთი მექანიზმები, რომლებიც ხელს შეუწყობს კონკურენტუნარიანი ტენდერების ჩატარებას, სატენდერო წინადადებების სათანადოდ შედგენას და გამორიცხავს შესყიდვების კონკრეტულ პრეტენდენტებზე მისადაგებას. ამასთანავე, მუნიციპალიტეტმა გამოიკვლიოს კონკურენციის შეზღუდვის გამომწვევი მიზეზები და გაატაროს კანონმდებლობით გათვალისწინებული ღონისძიებები.

რეკომენდაცია N3:

მუნიციპალიტეტმა, სათანადო შიდა კონტროლის მექანიზმების შემუშავებით, რეგულარულად განახორციელოს შესყიდული სამშენებლო სამუშაოების მონიტორინგი, რაც უზრუნველყოფს ნაკლოვანებების დროულ გამოვლენას და მასზე ეფექტიან რეაგირებას. მუნიციპალიტეტმა შეისწავლოს შესრულებული სამუშაოების დაზიანებების გამომწვევი მიზეზები და გაატაროს კანონმდებლობით გათვალისწინებული ღონისძიებები.

რეკომენდაცია N4:

მუნიციპალიტეტმა შესყიდული სამუშაოების რაოდენობისა და ხარისხის შესახებ მაღალი რწმუნების მისაღებად, უზრუნველყოს მიმწოდებლისგან შესაფერისი და საკმარისი დოკუმენტაციის მიღება, რითაც დადასტურდება შესყიდული სამუშაოს ხელშეკრულებით გათვალისწინებულ პირობებთან შესაბამისობა. ამასთანავე, მუნიციპალიტეტმა, ადგილობრივი მნიშვნელობის საავტომობილო გზების რეაბილიტაციის სამუშაოების ხარისხის გაუმჯობესების მიზნით, იმსჯელოს მზა ბეტონის შესყიდვის ნაცვლად გზის დაგების სამუშაოების შესყიდვაზე.

რეკომენდაცია N5:

მუნიციპალიტეტმა დანერგოს სათანადო კონტროლის მექანიზმები და უზრუნველყოს, სახელმწიფო შესყიდვების შესახებ ხელშეკრულებიდან გამომდინარე, დარიცხული პირგასამტეხლოების ბიუჯეტში მობილიზება, რისთვისაც გამოიყენოს კანონმდებლობით დადგენილი სამართლებრივი მექანიზმები.

რეკომენდაცია N6:

მუნიციპალიტეტმა, შიდა კონტროლის მექანიზმების გამოყენებით, უზრუნველყოს მის მიერ დაფუძნებული კერძო სამართლის იურიდიული პირებისათვის გამოყოფილი საბიუჯეტო რესურსების მიზნობრივად ხარჯვის მონიტორინგი. თავის მხრივ, ა(ა)იპ − ხულოს სოციალური სერვისების ცენტრმა სრულყოფილად და დროულად აწარმოოს ავტოსატრანსპორტო საშუალებებისათვის გამოყოფილი ფინანსების ხარჯვის დამადასტურებელი დოკუმენტაცია.

რეკომენდაცია N7:

მნიშვნელოვანია, რომ საკრებულოს წევრების უფლებამოსილების განხორციელებასთან დაკავშირებული ხარჯების ანაზღაურების წესი და პრაქტიკა სრულ შესაბამისობაში იყოს მოქმედი კანონმდებლობის მოთხოვნებთან და შესაბამისად, ხარჯების ანაზღაურება განხორციელდეს სათანადო დოკუმენტების წარმოდგენის პირობებში.

რეკომენდაცია N8:

მუნიციპალიტეტის მერიამ უზრუნველყოს შიდა აუდიტის და მონიტორინგის სამსახურის საქმიანობის იმგვარი წარმართვა, რომელიც უზრუნველყოფს ორგანიზაციის შიდა კონტროლის სისტემის შესწავლასა და შეფასებას, ასევე პროცესებში არსებული რისკებისა და სისტემური ხარვეზების გამოვლენას. მიღებული შედეგების საფუძველზე, სამსახურმა შეიმუშაოს რეკომენდაციები და განახორციელოს მისი მუდმივი მონიტორინგი.